A herdanza secreta do val

No val do Mao, seis curmáns, fillos da primeira xeración da diáspora, xúntanse por vez primeira dende que eran adolescentes. En xogo está a herdanza de Anselmo, o seu tío, a quen moitos non ven dende aquel verán en que todo saltou polos aires. Anselmo era solteiro e non tiña fillos, así que todo apunta que eles serán os seus herdeiros. Queda por saber se o serán todos ou só algúns. Ou quizais ningún. Ata que descubran a resolución final, haberá expectativas, rancores, xenreiras, ambicións, rivalidades, segredos e tamén a lembranza do que un día foron… e xa non volverán ser. Mais, sobre todo, haberá sorpresas que farán que a todos se lles cambalee o chan que pisan. O chan milenario do val do Mao. Seis curmáns. Seis versións da mesma historia. Seis xeitos de recordar… ou de esquecer. Unha herdanza en xogo. E unha carta con todo o que Anselmo nunca chegou a dicirlles. A herdanza secreta do val é unha novela curta que fala de ambición, de soidade non desexada e do abandono do rural galego, mais tamén do sentimento de pertenza e da morte, que, como a vida, é unha arma que dispara balas de futuro.